Dous conceptos que connotan e denotan, que son a un mesmo tempo “espazos tanxentes” e “espazos diferenciais”. Podemos dicir que territorio é unha porción de espazo pertencente a unha nación, rexión, provincia… Segundo Claude Raffestin “o produto que resulta a partir do espazo polas redes, circuítos e fluxos proxectados polos grupos sociais”. Polo tanto o territorio apóiase no espazo, pero non son termos equivalentes. O territorio é xerado a partir do espazo e é o resultado da acción dos distintos axentes, dende o estado ao individuo, pasando por todas as organizacións pequenas ou grandes, pola colectividade do individuo. Pero o territorio tamén se orixina no límite. Henri Lefebvre definiu o espazo como a prisión orixinal e o territorio como a prisión que o home se proporciona. É dicir, o termo territorio fai tamén referencia á noción de límite. Esta noción explica a relación que mantén un grupo cunha porción do espazo. A acción deste grupo xera inmediatamente a delimitación.

E neste “cruce de límites” encontramos a nación e as identidades nacionais, os límites territoriais e os Estados recoñecidos internacionalmente como tales, que son resultado de procesos históricos dinámicos, procesos cambiantes en continuo estado de conflito e tensión.

IAGO EIREOS (Lugo, 1980) proponnos un proxecto expositivo sobre a idea de nación a través de intervencións artísticas que poñen en diálogo conceptos como memoria, historia, estado, goberno, bandeira, himno, territorio, fronteira, pobo ou cultura. Este é un proxecto analítico, que se desenvolve a partir de interrogantes acerca da orixe da nación, dos seus elementos básicos ou diferenciadores, da relevancia da bandeira, de como se forxa a identidade dunha nación e que aspectos a configuran, de como se establecen os límites (físicos, políticos, xeográficos, culturais, económicos) sobre o territorio, etc.

Documentación e investigación derivan na experimentación plástica e visual a través dun despregamento técnico de multitude de disciplinas artísticas. O debuxo e o papel serán protagonistas nunha especia de arquivo documental, dun estudio de indagación científica e pescuda, en referencia a esa memoria colectiva e individual que revela as contradicións e tensións da historia dunha nación. O gravado, pola súa parte, será a testemuña da xeografía do poder, dos criterios políticos, lexislativos e normativos que ateñen a formación dun estado, producindo (e reproducindo) un dirixido orden social. Pintura e son serán os elementos que Eireos utiliza nas interpretacións dos conceptos bandeira e himno, como representación, icona e identidade. O territorio e a fronteira, o concepto do límite, estarán latentes a través da pintura en gran formato, onde a cartografía cambiante do mapa é a protagonista plástica. Mentres que os conceptos pobo e cultura serán traballados dende o eido audiovisual, sendo analizados valores, símbolos e discursos históricos que amalgaman e cohesionan a un grupo de persoas que comparten un territorio determinado, constituíndo un/o seu diferencial cultural identitario. En resumo, o proxecto expositivo “NACIÓN S.A.” de Iago Eireos orixínase no seu interese por reflexionar sobre a idea do límite, a fronteira e o conflito, a construción e reconstrución da nosa identidade (espazo-temporal), a nosa memoria e o noso imaxinario a través do nosoterritorio no mundo. Do noso “lugar” simbólico.